საქართველოს სოფლის განვითარების ქსელი თანამშრომლობისა და სიახლის შექმნის საუკეთესო გზაა. მისი მიზანია ინფორმაციისა და ცოდნის გაცვლა სოფლის განვითარების პოლიტიკის განხორციელებაში ჩართულ ყველა პარტნიორსა და დაინტერესებულ მხარეს - საჯარო და კერძო სექტორს, სამოქალაქო საზოგადოებასა და სათემო ჯგუფებს შორის. მისი მეშვეობით ვრცელდება სოფლის განვითარების პოლიტიკის განხორციელების კონკრეტული მაგალითები, მშრალ რიცხვებს მიღმა არსებული ადამიანური ისტორიები, რაც ხელშესახებად აჩვენებს, თუ რა შედეგი მოაქვს სოფლის განვითარებას საზოგადოებისთვის.
სოფლის განვითარების ქსელები ევროკავშირში მიღებული პრაქტიკაა და ყველა წევრ და ზოგიერთ კანდიდატ ქვეყანაში მოქმედებს. მათი მიზანია ინფორმაციის გავრცელება, თანამშრომლობის ხელშეწყობა და იმ ცოდნისა და უნარების განვითარება, რომლებიც სოფლის განვითარების პოლიტიკის განხორციელებას და შესაბამისი პროგრამების წარმატებას განაპირობებს.
